شتاوي(للشتاي عبدالفتاح سيويد)

نجري ودموعي تجارى-خايف تنزح دون ادياره
ذنبك ياعين علي جنبك-درتي نيران ولاذن بك
نفتش فيه العقل وخايف-نلقى فيه مغير حسايف
في عقلي دسيت دسايس-مايعرفن غير القايس
انلاقي ف النار ملاقاه-امغير اينجي في الله
اللي ماعمره جرب نار-عليش ايقولوا دار ودار
تميتو يالاي اقريب-جيرة يا لولاف اتشيب
فينا ريت عزيز يماهي- لاقاللنا لا لباهي
كي صبن لقسام معانا-ما من غايب غاب وجانا
الله الله لوكان نصيد-انطرف بك ياعين بعيد
نمشي وين و وين انسيب-نار بعيد ونار قريب
كيف مشو مربوحة قلتي-لكن ثاني يوم ذهلتي
ربطت مع لولاف كلام-ان ما قسمو نغفر لوهام
خذتني عبرة شور الدار-مشيت اندودش في لنظار
ايام ونا فاضي للصوب-عزقت بداره تحت اشبوب
انسكر باب المرهونين-اتنوض اتعورج فيه العين
مانبي يا عين انعدد-غير المليانة اتبدد
الخاطر ثاريته مازال-كبير وحمال وشيال
بعد ماكان الياس خصيم-اليوم مسلم لي تسليم
من قابيت عزيز قريب-ما م اللي ياعين امريب
يا نار المرهون تضري-لاتنجحدي لا اتوري
يا اللي ما عندي خاطيك-مازالت نراجي في جيك
امتى يا القديم اترد-اللي متشمت مالا حد
قدامك يانار جرينا-مانحسابوك تلاقينا
حلك ياعين احلمتيبه-ماصدقنا فض سريبة
أوقضت لروحي هانا دون-أني متعوز في مرهون
يا لنظار عليك محنة-لط عزيز وسامحتنه
درت غلا مره وحيده-ما زلت نعادي في كيده
درت غلا في عز العازة-وازيت وما با يتوازى
جد علي غلا كنيبه-وحده واثنين نداويبه